1 കുന്നംകുളത്തിന്റെ പൈതൃക ഇടങ്ങൾ
തെളിവുകൾ അടിസ്ഥാനമാക്കി ഭൂതകാലത്തെ ശാസ്ത്രീയമായി രേഖപ്പെടുത്തുന്ന പഠനമാണ് ചരിത്രം. ചരിത്രരചനക്ക് സഹായകമായ ഒട്ടേറെ തെളിവുകൾ ഓരോ കാലവും എല്ലാ പ്രദേശങ്ങളിലും പല രൂപത്തിലും അവശേഷിപ്പിച്ചിട്ടുണ്ടാകും. കാലം മാറുമ്പോൾ അതിനോടൊപ്പം അവിടുത്തെ സ്ഥാപനങ്ങളും കെട്ടിടങ്ങളും വഴികളും അങ്ങനെ പലതും മാറ്റങ്ങൾക്ക് വിധേയമാകുന്നു. എന്നിരുന്നാലും ഈ മാറ്റങ്ങളുടെ പിന്നിൽ മാഞ്ഞു പോകാതെ നിലനിൽക്കുന്ന പല ഓർമ്മകളും ഉണ്ട്. അതാണ് ചരിത്രം. ഈ മാറ്റങ്ങളെല്ലാം ചേർന്നാണ് ഒരു പ്രദേശത്തിൻ്റെ യഥാർത്ഥ ചരിത്രം രൂപപ്പെടുത്തുന്നത്. ഇവ രേഖപ്പെടുത്താതെ പോയാൽ നാടിൻ്റെ ചരിത്രം പലതും പതുക്കെ വിസ്മൃതിയിലാണ്ടു പോകും. ഈ തിരിച്ചറിവിൽ നിന്നാണ് പുതുതലമുറയിലെ ചരിത്ര അന്വേഷകർക്ക് ഒരു വഴിക്കാട്ടിയായി നിലകൊള്ളുക എന്ന മഹത്തായ ലക്ഷ്യത്തോടെ ഹിസ്റ്ററി ഫോറം എന്ന കൂട്ടായ്മ കുന്നംകുളത്ത് രൂപം കൊണ്ടിരിക്കുന്നത്. നമ്മുടെ നാട്ടിലെ പുരാതന സ്മാരകങ്ങൾ, ജനകീയ പ്രസ്ഥാനങ്ങൾ, സാമൂഹിക പരിണാമങ്ങൾ, നാടൻ കലകൾ, ആചാരങ്ങൾ, അനുഷ്ഠാനങ്ങൾ തുടങ്ങി നമ്മുടെ പൈതൃകങ്ങൾ കാലത്തിൻ്റെ തിരക്കിൽപ്പെട്ട് വിസ്മൃതിയിലാണ്ട് പോകാതിരിക്കാൻ ഒരു കൂട്ടായ പരിശ്രമം അനിവാര്യമാണ്. ഈ പരിശ്രമത്തിന്റെ തുടക്കം ആകട്ടെ ഹിസ്റ്ററി ഫോറം.
ലക്ഷ്യങ്ങൾ
*നമ്മുടെ നാടിൻ്റെ സാമൂഹിക- സാംസ്കാരിക- രാഷ്ട്രീയ- വിദ്യാഭ്യാസ ചരിത്രത്തെ കുറിച്ച് ആഴത്തിലുള്ള വിവര ശേഖരണം നടത്തുക .
*പ്രദേശത്തെ പുരാതന കെട്ടിടങ്ങൾ, സ്മാരകങ്ങൾ, ശിലാശാസനങ്ങൾ, ആരാധനാലയങ്ങൾ, പുരാവസ്തുക്കൾ തുടങ്ങിയവയുടെ സംരക്ഷണം.
*മുതിർന്നവരിൽ നിന്നും നാട്ടറിവുകളും അനുഭവ കഥകളും ശേഖരിച്ച് രേഖപ്പെടുത്തി സൂക്ഷിക്കുക.
*പുതുതലമുറയിൽ ചരിത്രബോധം വളർത്താൻ ഉതകുന്ന വിധത്തിൽ ചരിത്ര ക്യാമ്പുകൾ,പ്രഭാഷണങ്ങൾ, സെമിനാറുകൾ, ക്വിസ് പ്രോഗ്രാമുകൾ, പഠനയാത്രകൾ, പൈതൃക യാത്രകൾ, എന്നിവ സംഘടിപ്പിക്കുക.
* പഴയ രേഖകൾ, പത്രക്കുറിപ്പുകൾ, പുസ്തകങ്ങൾ, ചിത്രങ്ങൾ എന്നിവ ശേഖരിച്ച് ഒരു 'പ്രാദേശിക ചരിത്ര ആർക്കൈവ്' രൂപപ്പെടുത്തുക.
*ചരിത്രവുമായി ബന്ധപ്പെട്ട പ്രദർശനങ്ങൾ, സെമിനാറുകൾ, ദിനാചരണങ്ങൾ എന്നിവ സംഘടിപ്പിച്ച പൊതുസമൂഹത്തെ ചരിത്രബോധമുള്ളവരാക്കി മാറ്റുക.
*ചരിത്രത്ത ' ഇന്നിൻ്റെ' വ്യത്യസ്ത മേഖലകളുമായി ബന്ധപ്പെടുത്തി ചിന്തിക്കാൻ അവസരം ഒരുക്കുക
ചരിത്രം മറക്കുന്ന ഒരു സമൂഹത്തിന് ഭാവി നിർമ്മിക്കാൻ സാധ്യമാവുകയില്ല. അതിനാൽ നമ്മുടെ നാടിൻ്റെ ചരിത്രം നമ്മൾ തന്നെ എഴുതണം, സംരക്ഷിക്കണം, അത് മറ്റുള്ളവർക്കായി പകർന്നു നൽകണം. അതിനായി കുന്നംകുളത്തും സമീപപ്രദേശങ്ങളിലും ഉള്ള വിനോദസഞ്ചാര - പൈതൃക ഇടങ്ങളെ കുറിച്ചുള്ള കുന്നംകുളം ഹിസ്റ്ററി ഫോറത്തിൻ്റെ കണ്ടത്തലുകളാണ് ഇവിടെ രേഖപ്പെടുത്തുന്നത്.
ഹിസ്റ്ററി ഫോറം
കുന്നംകുളം.
30/04/2026.
No comments:
Post a Comment